白汁雞皇飯 Creamy Chicken Rice in White Sauce

在香港時，間中都會食下KFC，除了辣雞，還喜歡叫蘑菇飯和雞皇飯，每次也在想配那一款飯較好。
來到澳洲之後，這裡的KFC沒有這些，想食便要自己煮喇！試左一兩次，味道都幾似，大家都可以試下。

食譜（2-3人份 )

材料

去皮雞脾肉　　　1-2塊（約280-300克）
　／雞胸肉
薯仔　　　　　　1個
甘筍　　　　　　1條
洋蔥　　　　　　半個
青豆　　　　　　30克（選擇性加入）
白飯　　　　　　2-3碗

白汁
牛油　　　　　　30克
牛奶　　　　　　400毫升
麵粉　　　　　　20克
水　　　　　　　250克
鹽　　　　　　　1茶匙
黑胡椒碎／粉　　半茶匙

雞肉醃料
鹽　　　　　1/4茶匙
胡椒粉　　　少許

做法

1. 雞肉去除肥的部分，切粒並加入醃料醃10-15分鐘。

2. 洋蔥、薯仔、甘筍切粒。青豆解凍。

3.  鑊中加一點油，中火預熱，先炒香洋蔥粒，再加入薯仔粒甘筍粒炒勻。

4. 加入雞粒炒至半熟，加入鹽及黑胡椒碎

5. 加入約250毫升水，此時可加蓋焗一下，間中攪拌一下至水份收乾及薯仔變軟身。（如薯仔仍很硬，可再加水煮多一會。煮好後先盛起備用

6. 原鑊小火加入牛油，煮溶後篩入麵粉，快手拌勻至沒有粉粒的幼滑麵漿。

7. 倒入牛奶，繼續快手攪勻，令牛奶和麵漿混合成稠身白汁。

8. 將剛煮好的薯仔甘筍雞粒，和青豆一起加入白汁，拌勻並中小火煮滾試味，如不夠味可加鹽調味，如太稠身可以加一點牛奶或熱水。

9. 再煮一下便完成，可配白飯或意粉食用。

小貼士

• 麵粉可選用高筋麵粉或中筋麵粉皆可。
• 煮白汁時必須要快手拌勻麵粉至沒有粉粒，否則白汁會不夠滑身。
• 不用牛油可用其他菜油／橄欖油代替。